full screen background image

Gimnastiek­loopbaan eindig op hoë noot vir Jeanie

385

“Met harde werk en deursettingsvermoë is sy die mees gevorderde artistiese meisiesgimnas in Limpopo. Sy was ook die enigste gimnas van die provinsie wat aan die federasie se Suid-Afrikaanse Kampioenskappe in Kaapstad deelgeneem het en het boonop drie medaljes verower. Sy het ‘n silwer medalje vir haar vloerprogram en brons medaljes vir die brug en spronge gewen.”
Só som Zani Prinsloo, mede-eienaar en hoofafrigter van Zanis Gymnastics Academy Jeanie Hatzikyriacos se gimnastiekprestasies op.
Jeanie, ‘n vlak 7-gimnas het onlangs haar gimnastiekloopbaan op dié hoë noot afgesluit nadat sy as vierjarige haar eerste bollemakiesie by Zanis gemaak het en een van ‘n handjievol gimnaste is wat tot die gespesialiseerde vlak vorder.
“Van vlak 6 af raak die apparate en spronge baie ingewikkelder en dit verg harde oefening en konsentrasie om op dié vlak te pres­teer, ” sê Prinsloo.
Sy wil na skool verpleging deur Mediclinic studeer en hoop om daarna uiteindelik as fisioterapeut te kwalifiseer.
“My gimnastiekloopbaan is dalk nog nie heeltemal verby nie. Ek sal kyk hoe dinge verloop en dalk verder aan my gunstelingsport deelneem.”
Na 14 jaar as gimnas erken sy dit het uithouvermoë gekos om so ver te vorder.
“Gimnastiek is iets wat ek altyd wou doen as ontsnaproete van my daaglikse roe­tine. As ek by die gimnastieksaal ingestap het, was ek in ‘n ander wêreld. Ek wil almal by Zanis bedank vir ‘n wonderlike tyd,” sê Jeanie.

RC Myburgh
>>rc.observer@gmail.com